Rematadas as obras de restauración do azude da área recreativa da Presa, financiadas pola Xunta de Galicia

O Concello de Frades informa da finalización das obras de recuperación do encotro sobre o río Tambre e posta en valor da contorna fluvial da área recreativa da Presa. Unhas obras froito dun convencio de colaboración asinado en setembro deste mesmo ano polo alcalde de Frades, Roberto Rey, e a conselleira de Medio Ambiente e Cambio Climático, Ánxeles Vázquez, polo que a Xunta de Galicia destinou preto de 50.000 euros. 

A Xunta de Galicia, a través de Augas de Galicia, asumiu o financiamento da actuación, que permitíu restaurar un tramo de 15 metros do azude que, ademais de dar servizo a unha antiga central hidroeléctrica no limítrofe concello do Pino, xera unha zona axeitada para o baño que é orixe dunha das primeiras praias fluviais de Frades. Así, esta intervención permitirá devolver a este espazo todo o seu valor ambiental e funcional, favorecendo o uso responsable desta contorna fluvial que é moi utilizado por veciñanza e visitantes para desfrutar do seu tempo de lecer. Os traballos consistiron na reconstrución do encoro mediante bloques de pedra granítica de entre 400 e 800 quilogramos.

Pola súa banda, o Concello de Frades, que se encargara da realización dun proxecto técnico que minimizaba o impacto da maquinaria precisa para realizar a actuación neste espazo natural emprazado no dominio público hidráulico da Demarcación Hidrográfica de Galicia Costa, asumirá agora a titularidade do encoro.