O Programa de Verán do Concello de Frades recolle máis dunha trintena de actividades para todos os gustos e idades
O Concello de Frades vén de presentar a súa programación para o verán 2025, que recolle máis de trinta actividades para todos os gustos e idades. Iniciativas que van dende doce excursións, a media ducia de actividades deportivas e, sobre todo, numerosas iniciativas dirixidas a nenos e nenas, con programa de conciliación familiar como buque insignia. Unhas actividades que se poden consultar na web municipal: www.frades.gal e que están recollidas nun folleto informativo que proximamente chegará a todas as vivendas do municipio.
O Programa de Actividades de Verán de Frades mantén iniciativas xa tradicionais e que tanto éxito rexistraron nos últimos anos como os Xoves de Praia, a excursión ao Aquapark, o Día do Neno, as noites de cine e actividades deportivas como o campionato municipal de pesca infantil, os cursos de natación, o maratón de fútbol 7 ou campionato de pádel.
Así mesmo, propón novas iniciativas como unha excursión a Sanxenxo, Cambados e Combarro o sábado 9 de agosto, que inclúe unha viaxe en catamarán pola ría de Arousa; ou unha viaxe de seis días á Costa de Azahar en outubro, con visitas a Peñíscola, Tortosa, Delta do Ebro, Morella, Vilafames e Vinarós. Outra novidade é a ampliación dos cursos de verán, que inclúen natación, pilates, ximnasia, zumba, pádel, hipopresivos e ioga.
A maioría das actividades son de participación libre e gratuíta, se ben en todo caso sempre será preciso anotarse previamente no Concello de Frades: 981 695 567 ou 981 695 663.